أضحى جديد..وأمل أفضل

كل عام وأنتم بخير
ربنا يتقبل منا صيام العشر والأضاحي ويجعلنا ممن يغفر الله ذنوبهم
والحقنا يالله بعبادك الصالحين الذين طافوا ببيتك الحرام وزاروا نبيك الحبيب
يالهي اللهم أسالك أن تجعلنا ممن يحظون بزيارة بيتك الحرام ونبيك الحبيب المصطفى فى الأعوام القادمة
وازرقنا بالهدى والسكينة حتى نلقاه أما بزيارة مقامه أو في الأخرة ونشرب من يده شربة ماء لانظمأ بعدها أبدا
اللهم أمين

مكرم نقيب...ولاعزاء لشباب الصحفيين

أصبح مكرم محمد أحمد ، نقيبا للصحفيين ، ولايسعني أن أقول حسبنا الله ونعم الوكيل فيمن انتخبه ..كل من انتخبه فكر في حياته المهنية ومرتبه ومعيشته ونسوا حرية الصحافة وأملنا في الكلمة الحرة عشان ينتخبوا عضو حزب وطني وأهرام وكمان من أكبر المطبعين مع إسرائيل ، والأهم أنهم تناسوا حضرتنا ،الجيل الجديد من الصحفين

فالجيل الجديد من شباب الصحفيين خريجي كليات الإعلام ، الذين يعملون في الصحف أما من غير فلوس أو من غير اسم ، أو الاثنين معا ..أو ربنا كرمهم زي حالتي وبياخدوا فلوس"ملاميم طبعا" وبينزل اسمهم.. الحمد لله على كل شئ طبعا..أنا بقي كان لي السبق في إنى احضر انتخابات النقابة واغطيها عن قرب ، كل المرشحين فكروا في الأجور والشقق والرعاية الصحية ..والله على عينى ورأسي ، بس ماحدش فكر فينا ، فكر في أننا من حقنا نكون صحفيين معترف بنا من نقابتنا وأننا مش عمال تراحيل في الصحف ، ولامجرد عمال بالأجرة عد رؤساء الأقسام ورؤساء التحرير ،احنا لنا حق في أننا يعترف بنا ويكون لنا حماية وكارنيه محترم ، لأنه كل الشباب اللي بيشتغل في الصحافة ليس لديه دليل أن صحفي لا من الجرائد التي ترفض أن تعطي لنا كارنيهات ولا من النقابة ..واحنا بقي بلا هوية رغم أننا متمرتين يمكن أكثر من الصحفيين الكبار ..يرضي ربنا ده

وطبعا مادام مكرم جيه، وهو من أنصار تقليص الجماعة الصحفية ،وكفاية اوى أنهم 5.000 صحفي ، وأن الفلوس اللي بتجي لهم يادوب على اد الصحفيين ومافيش امكانيات لغيرهم ..ده معناه حلنى بقي على مانشوف سلالم النقابة ، انا مش حزينة على العضوية ، هى ولاتهمنى أنا حزينة على حقي ، واعتراف القانون بي كصحفية ..مين يجيب لنا حقنا ، نفسي حد يفكر فينا ..احنا مطالبنا بسيطة أننا نكون لنا هويتنا الصحفية ومرتبات بسيطة تمكنا أننا نعيش لأننا مش عبيد في جرائد ، وتدريب مهنى ليس قاصرا على أعضاء النقابة فقط..للأسف كل حاجة بنحاول نشترك فيهافي النقابة تجد الشرط الأول : أن تكون عضوا مقيد مشتغلا بنقابة الصحفيين ،مشتغل موجودة أ لكن عضو بقى نجبها ازاي ، ده تمييز ، ومنهم لله ، لا أملك غير حسبي الله ونعم الوكيل فيمن اختار مكرم ..وربنا يستر علينا بعد كده وهنشوف هيتعمل فينا ايه ؟؟

لحظة انبهار

يداهمنا بقوة ، يجعل مننا عجينة طرية قابلة للثنى والطرق ، إنه هذا الجبار ، تأثيره يفوق ومضة فلاش السيارة عندما تفقدك الرؤية فهو يُحيك وسط الظلمات لسنوات ...إنه الانبهار هذا القاتل الفاتك الذى لايكفيه ان تصبح عبدا له ولكنه يستحوذ على عقلك وتفكيرك ، يجعلك تؤمن وتصدق الشئ المنبهر به وتعتقد إنه أفضل مافى العالم ، وأنه ملائكي بلا عيوب بلا شوائب وتظل هكذا حتى تذوب فى كيان ما انبهرت به ...وهنا المفاجأة
اللعنة ..اللعنة عليك أبها الانبهار تخطف أوراحنا وأبصارنا ثم تتركنا على حافة الحقيقة وعلينا أن نواجه واقعنا المؤلم بعد أن ُأُُجريت لنا عملية للابصار وزرعوا لنا تلك الأعين الحادة التى تظل واقفة لا تحنيها الرموش ولاتعرف التعب والاجهاد تنقب عن مرارة الحقيقة.
لماذا جئت ومن أين؟ ، واقتحمت على حياتى بسم الابهار والانبهار فاستسلمت لك وحلمت أن احقق معك وفيك أسمى طموحاتى ، ظننت أنك الأفضل والأعلى والأجمل فى زمان بات الجميع منطفئون مملون ، حياتهم كيئبة
ما زلت اذكر كيف كنت أتمنى أن أكون جزءا منك ومن عالمك ، وأن يتردد اسمى بداخلك وعلى ألسنة من يعرفوك ، سعيت إليك وذهبت حيث أنت ،عرضت أن أكون بجابنك وأعمل معك، خطواتى نحوك كانت طائرة لااملك تثبيتها ،أنفاسي حائرة لم ترتاح إلا بجوارك ، إرادتى انعدمت أمام ابهارك لى ، لم أكن ارى سواك ولااسعى إلا نحوك وطموحى أن أكون بداخلك ...ودخلت عالمك و اقتربت منك ، وعشت تحت جلدك ورعايتك ، صنعت لى اسما وشكلا بجابنك ، وتخيلت أننى أدركت الأمان معك ، وأصبحت جزءا لا يتجزأ منك ، سعادتى غامرة وفرحتى لاتوصف وحبي لك يزيد كل يوم ، أحلامي وطموحاتى وولائى وانتمائي أشياء امنت بها وعرفتها لأجلك لأعيشها لك...ظننت لوهلة أنك تعرفنى وتراقبنى وتهتم لأمرى وترفعنى إليك ..يا لك من ملعون أيها الانبهار أوهمتنى بكل ذلك ...
بدأ الوقت يمضى ، 3 أعوام وأنا أحى فى هالته ، داخل عالمه ، مؤمنة به ، أضحيت حارسة فى أرضه ، لكنه تخلى عنى ، طردنى واعتبرنى أقل من أكون معه ، قال لى أنه لا يريد إلا من يفهم قواعد اللعبة ، فتركت عالمه بانكسار قلب أسد وأنا احتفظ بأمل العودة بكبرياء حتى جاء طلبه بأن أرجع لأكون معه من جديد ، لم أصدق أنه انتقص من غروره وكبرياءه وطلبنى ، ذهبت إليه شامخة ينتابنى الزهو والفخر لأول مرة منذ التقيته ، ونسيت ماحدث وتعهدت ببداية جديدة ، لكن ليس كل ماهو جديد جميل ...فبعد عودتى صارت الأمور أكثر وضوحاً وشعرت بالوميض يتلاشي تدريجيا ليظهر أمامي ، لم أعرفه ، لم يكن هو من أحببته وأردت أن يدخلنى عالمه...أضحيت أرى ، اتعلم كيفية رؤية الأشياء فى نصابها ، بدأت افيق من ضباب الانبهار ، شيئاً فشيئاً ذهبت كل قناعاتي ومبادئي وانتمائي وولائي أدراج الرياح
مشكلتى أننى بدأت أفهم وعقلى شرع فى التفكير والاستيعاب بل وتسلط على الفهم والفكر ليحيلا حياتى إلي دائرة من الشك والرصد والتحليل والترقب حتى أضحي كل شئ أمامي واضح وقدرتى على الاستنتاج بارعة دائما ما استنتج الأسوء نحوه ويصدق حدسي ، كل هذا وأنا مازلت داخل دائرته اتمزق بين حبي وولائي له وعقلي الذي لايرضى بهذا الزائف بعد أن أبصرته عيناي دون رادء الانبهار.
اُقتل كل يوم ، اموت من حيرتي وصدمتي ، أهذا هو الشئ الذي امنت له وأحببته ، أتغير حقاً أم أنه كان بهذه البشاعة و خدعت فيه عندما عشت في كهف الانبهار
سامحني يا الهي لم أكن أدرك أنه هكذا ،وساعدني أن اتخذ القرار ، لتكن بيدي لا بيد عمرو ، سأرحل عنه قبل أن يدمر ما بقي من أطلال ذكري نقية له في نفسي ، سأرحل قبل أن اتحول لكتلة صدأة مزرنخة ، سأرحل بلا رجعة ولن انتظر أن يطردني من جنته المزعومة ، سأرحل وأنا اجاهد لامحو من ذاكرتي صورا لوثها بضباب الانبهار ..فساعدنى يا الهى .

نصر بدماء الأبرار

..اكتب عن ذكرى نصر أكتوبر لأعلن امتناني لكل من روت دمائهم أرض سيناء ، لشهداء مدن القناة وبورسعيد ، لشهداء كاشيد وبئر سبع ، لأرواح الأسرى التى ترفرف في السماء تزين ليالينا الحزينة تذكرنا بمعانى التضحية والفداء التى كادت أن تختفى من حياتنا

لكم يا أنقى المخلوقات

أرق وأعذب الكلمات

بكم يامن رفعتم الرؤوس

رفعنا أعيينا من تحت الغبار

باسم أجيال لم ترى نيران الحرب

باسم شباب لم يعرفوا معنى القتال

ندين لكم بحريتنا وحياتنا الحرة

وسامحونا إننا لم نكمل مسيرتكم

فلم يعد فى مقدرونا لاالجهاد والتضحية

تحياتى ياشهداء الحلم الحر

تحياتى ياخير أجناد الأرض

ونسيت أن لي قلباً

عندما يكون حبك
أسمي آمالي
وتحطم أنت الأمال
فلقد منحتني الفرصة
منحتني القوة
لكي أقاومك
وأمنعك بشدة
أن تعود لي
أحببتك يوم أن كنت
إنسانا له قلب
اليوم من أحببت مات
وأصبحت أنت صنماً
وأنا لا أهوي الأصنام
لماذا عدت؟
لتستدر عطفي
لتذكرني بحبك
من قال أن هناك حب
من قال أن هناك وعد
أنت قلت
وكنت أول من نسي
فنسيت أنا أيضا
حقي ، أليس كذلك؟
يوم أن اتخذت القرار
وخنتني
أمت الحب
ودنست العهد
وأنكرت الحلم
فارحل
بتوسلاتك البائسة
بدموع التماسيح
بكلماتك الزائفة
واتركني
أبدأ من جديد
أعيش عمري
أحقق الأمال التي
ضاعت وانكسرت
يوم أن أحببتك

أتعلم ؟
أنني سعيدة
ببعدك عني
بهجرك لي
نعم
لأنك وحدك
الذى ستندم
على نقاء حب
أضعته بيديك
وحدك
ستتذكر الوفاء
الذي قابلته بغدر
وحدك ستعود
أما أنا
سأنساك
وأتذكر فقط
أنني لي قلب
يبنض ويعيش
قلبي يستحق أن
يهوي فقط
من يقدر حبه

رمضان كريم عليكم

رمضان كريم

ربنا يبلغنا جميعاً رمضان ويجمعنا وفي الجنة

ويرزقنا بصحبة النبي وصاحبته أجمعين

مَلكْ والدبدوب

في تمام الساعة العاشرة والتصف مساءٍ , وقفت على محطة مترو جمال عبد الناصر في انتظار العلبة الصفيح المتعددة الألوان من مساحيق الإعلانات أو كما يسميه أحد أصدقائي الأعزاء " الأنبوب" ، وبقدومه تدفقت الجماهير وأنا معهم إلي داخل الأنبوب ، واتخذت مكاني المعهود جانب الباب وبدأت التقط أنفاسي وافتح شنطتي لإخرج منها الكتاب الذي اقرأه ، فإذا بها تلتفت بعينها نحو دبدوبي الذي أعلقه في الشنطة وتمتد يدها الصغيرتين بمساعدة والدها الذي يحملها لتمسك بالدبدوب وتلعب معه وتجذبه بقوة نحوها لترتسم على شفاها أجمل بسمات الأرض ، فما كان إلا أن نهيت وثاق الدبدوب بشنطتي وأعطيتاه اياه ، فإذا بها تحتضنه وتقبله وتضعه في فمها وتتفحص أرجله الصغيرتين مثل رجليها التي تدب على الأرض كقطرات الندي ، وتنظر إلي "التي شيرت" الأخضر الصغير الذي يرتديه، وتري من خلال عيناه عيناها الجميلتين المختفيين وسط بشرتها القمحية الطفولية ويغطيهما شعرها الأسود المتدلي عليهم من كثرة الحر ومجهود اللعب مع الدبدوب

وفجأة وجدتها قريبة مني ووالدها يعطيها لي لتقبليني ، فاحتضنتها وجعلت من يدي كرسي مريح تجلس عليها لتلعب برجلها ذهاباً واياباً، ثم أرجعتها مرة أخري لوالدتها التي بدأت تناوشها ، وطوال الطريق وأنا أقرأ سطر وانظر إليها في السطر الذي يليه ، اتفحص فرحتها بالدبدوب وبسمتها الرقيقة والسعادة التي تنميت أن أكون سببها وأن أكون استطعت أن أجعلها سعيدة ولو لدقائق بسيطة لم تكمل ساعة من الوقت، وأخذت اتابعها وشعور بالسعادة غريب يجتاحني لرؤيتي بسمتها ولحملي اياه وتمنيت لو أن الساعة تتوقف ولا أصل بيتي لاظل معها ..ومرت الساعة الا ربع التي اقضيها في المترو قبل أن يصلني إلي محطتي " عين شمس " كنسمة صيف في أيام الحر التي نشهدها ، ونزلت المحطة وهي معي يحملها والدها ، ومن الواضح أنهم يقيمون في عين شمس ، واعطت لي والدتها الدبدوب، فطلبت منها أن تأخذه هدية فرفضت و شكرتني، إلا أنني استائذنتها في أن تسمح لي بتقبيل ابنتها ثم سألت والدها عن اسمها فقال لي : " اسمها ملك " ..حقا أنها ملك صغير ادخل السعادة على قلبي الذي قلما مايشعر بالسعادة ، فشكرا لك ياالله على الجمال والسعادة الذين منحتهم لي عبر ملك ..شكرا لك

نقمة أم نعمة ؟

قبل أن اكتب اي شيء اعتذر بشدة عن انقطاعي عن الكتابة لفترة طويلة ..ولكن عذري الوحيد أنني لم تكن لدي القدرة الذهنية الصافية التي تمكني من اختيار موضوع نتناقش فيه معاَ

في حياة كل مننا أشياء يحبها ، وتختلف بالطبع درجة حبه لهذه الأشياء باختلاف تأثيرها عليه، وبتغير الزمان **

والمكان، ولقد فكرت في أن الحب في حد ذاته قيمة عليا له قوة وسحر وبريق لايضاهيه أي شيء على الأرض ..فحبك لشيء يجعلك تجتهد لتجعله الأفضل والأحسن ،وتستمع كثيرا بجماله، وكلما زاد حبنا للأشياء زاد تعلقنا بها وارتباطها بطموحاتنا

الحب في حد ذاته خيط رفيع يربطنا بالكثير من الأشياء، قوته تفوق الكراهية، لأنع عامل بناء لاهدم

فما أجمل أن تحب عملك حباً حقيقاً ،وتحب الحياة ،والزهور والأشجار والمياه، وتحب من حولك، وتحب الحياة التي تعيش فيها وتحب نفسك وتحب أن تراها ناجحة ومحقة لطموحاتها، فضلا عن حبنا لأهلنا وأصدقائنا

ولاننسي حبنا الأكبر لله ورسوله، فحتي العلاقة الصحيحة بين العبد وربه لابد أن تقوم على فعل الحب ،وليس خوفا من عقابه أو طمعاَ في جنته ،بل نحبه من أجل الحب والتقرب منه

إذن الحب جميل في كل درجاته واتجاهاته ، وخاصة تجاه الكون أو المجتمع ، وهو ماجعلني أطلق على هذا النوع من الحب "اسم الحب الكوني " أو الحب الاجتماعي "،بالإضافة إلي الحب العاطفي بين الرجل والمرأة والذي اعتبره نتيجة ومحصلة ومؤشر على مدي قدرة الطرفين على حب الكون والمجتمع من حوله ....فإذا كان قادراَ على حب من حوله سيكون لديه العطاء ليحب شريك حياته

نعم الحب قوة واحساس يذوب معه كافة الفوارق والمشاعر السلبية ،ولكن أليس الحب يمكن أن يتحول في يوم إلي مشاعر سلبية؟ ، أليس من الممكن أن يؤدي الحب إلي هلاك صحابه ؟ ،وتصبح قوة الحب ،قوة ملعونة تدمر أي شيء

هذا قد يحدث ، فحبك القوي لأي شيء يدفعك دائماً لأن تصل به إلي المستوي الأفضل والأحسن ؛ لتشعر بأنك حققت طموحك منه ،فعندنا تفني سنين عمر في حب عملك أو حياتك وتقبل التنازلات ظناَ منك أنك ستحقق أحلامك ، ثم تجد أنما أفنيت فيه عمرك لم يضف لك شيئا ولم يحقق حلمك ستكرهه ،وتكره حبك للأشياء وستتحول قوة الحب إلي قوة انتقام ،حب أيضاً ولكن حب انتقامي يحولك من شخص قادر على الحب والعطاء والبناء ،إلي شخص لايملك إلاالخوف من كل شيء له علاقة بحب الأشياء ، يعطي من أجل المادة وليس من أجل القوة التي تغذيه ، شخص تحوله كراهيته المضادة إلي عامل هدم

في هذه الحالة ، يصبح الحب نقمة على صحابه ، ويصبح فعل الحب القوي الساحر له رد فعل من الكراهية المضادة

مساوً له في القوة ولكنه مضاد في الاتجاه

فهل الحب بمختلف أنواعه وأشكاله ودرجاته نعمة أم نقمة ؟ أم الحب ذاته النعمة والنقمة معاً ؟ أم أنه سلاح ذو حدين ؟ أم نعمة الحب ونقمته يحددهاالإنسان عندما يختار حب شيء بعينه؟؟؟

أسئلة كثيرة أعلم أنها قد تكون محيرة أو فلسفية ..ولكنها خطرت لي ،فأدرت أن تشاركوني بأرآئك التي اعتز بقرأتها ومناقشتها معكم....

يوم التخرج

اليوم11 يوليو 2007
انتهت دراستي بكلية الإعلام -قسم الصحافة- جامعة القاهرة بتقدير جيدجدا
الحمد لله اتخرجت بسلام وبدأنا حياتنا العملية ..رغم أن في مننا بدأ حياته المهنية بالفعل من قبل ما نتخرج بزمن ..
المهم ربنا يوفقنا ونقدر نخدم الناس والمجتمع ونكون صحفيين على حق مش زي نصف صحفيين دلوقتي ، ونرفع اسم الصحافة فوق دايما
******السؤال للجميع ( الدعوة عامة )مش لزواري من قسم الصحافة أو كلية الإعلام ******
**بس كان عندي سوال بسيط لكل زوار مدونتي اللي بيجبروا بخاطري دايما ..سواء من دفعتنا التي تمر بتجربة التخرج لأول مرة أو ناس سبقونا في التجربة ..
س: ايه احساسكم لما خلاص بقيتم مش محسوبين إلا على أنفسكم مش طلبة ولكن مواطنين وعليكم أن تفكروا في رسم المستقبل ؟..
س: وياتري الناس اللي اتخرجت دلوقي أو من فترة رسمت لها خطة لمستقبلها ومشيت عليها ولاعملت ايه؟

واسمحوا لي هاقول رأيي بعد آرائكم لأن موضوع التخرج ده عندي مختلف

تاج ...وهاجاوب عليه

، انا هاجاوب على تاج ارسله لي المدون الزميل بكار من فترة وكنت أجلت الجواب عليه حتي أنتهي من الامتحانات ولأني وعدته أني هاجاوب ..فأنا قررت أجاوب ...يارب بس يعجبكم

من هو:أحب شخص لقلبك فى الدنيا؟
..والله أنا بحب الناس كلها بس تقدر تقول كنت بحب أستاذي في مادة التاريخ "الله يرحمه"وكان قدوتي

إنسان مستعد تضحي بحياتك - ركز فى كلمة حياتك- علشانة؟
التضحية شئ كبير اوي ...اتمني اقابل الشخص اللي يستحق أضحي عشانه

اسم أول حب؟
مافيش..لان مافيش حتي الأن ولاحب في حياتي

اسم اخر حب(حتى الان)؟

هو كان في أول عشان يكون في أخر

ما هو :اسم أجمل كتاب كتبه بشر قرأته ومحتفظ به حتى الان ؟
عبقرية عمر

اسم كتاب-كتبه بشر برضة- انت متعلق بيه وبتقرأه كل فترة؟
قصص أجاثا كرستي ، يوسف السباعي ، يوسف ادريس

أهم جهاز منزلى انت متعلق بيه او بتستخدمه كتير ؟
الكمبيوتر

شىء تحس بالراحة النفسية عندما تنظر اليه ؟
السماء في درجة الصفا عندما تتحد مع الأفق البعيد فوق موج البحر الأزرق

مكان تحس فيه بالحنين إلى شىء لا تدرى ماهو و ذكريات جارفة الى لاشىء ؟

النيل

مكان تحس بالراحة عندما تدخله ؟
المسجد

أجمل مدينة زرتها داخل مصر ؟
اسكندرية و مرسى مطروح

أجمل مكان طبيعي رأيته داخل مصر؟
، ونهر النيل بالقاهرة ،شاطىء عجيبة فى مرسى مطروح

نوع هاتفك المحمول؟
موتورلا

اc18

سرعة بروسيسور جهازك ؟
مش فاكره

حجم ذاكرة –هارد- جهازك ؟
120

المساحة التى تشغلها المواد الاسلامية على جهازك ؟
مش حسبتهاأبدا ، ولكنها تضم ، قرأن كريم لمختلف الشيوخ ، وأغاني إسلامية لسامي يوسف ومسعود كوراتس ،وابتهالات للنقشبندي ، وأذكار لمشاري

نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
حاجة ربنا أعلم بها ..وإن شاء الله أتمني يجزيني بهاخير

أهم هدف انت واضعه لحياتك دلوقتى؟

أكون صحفية على قدر جيد من العلم والمعرفة والقدرةعلى ايفاد المجتمع والناس

مواصفات فتاة –أو فتى للبنات- الأحلام بالنسبة لك ؟
عايزه فيه لو 10% من سيدنا عمر بن الخطاب ، بكل شخصيته
يكون إنسان متدين عمليا وخلقيا أكثر من تدين الأفواه والملبس

أن يكون إنسان متفتح عاقل ، لديه قدرة على التحاور وفهم الأخر ، واحترامه

يكون بيحب القراءة و يكون له رأى و فكر و أسلوب فى الحياة,، وهدف عايش عشان يحققه

إنسان جرئ وقوي الشخصية وعند ه مبدأ

صف ما يأتى :شعورك لما بتسمع كلمة مصر؟
الحب ، والحسرة ، والأمل في الإصلاح ، والحنين

شعورك لما بتسمع كلام عن اليهود ؟

ليه هما أذكي مننا وبيستغلوا الفرص ..واحنا فاشلين

شعورك لما بتشوف ظابط شرطة ؟
بخاف من بعد قانون الطوارئ

شعورك لما بتشوف الكناس العجوز فى الطريق ؟
نفسي اروح اساعده ..وبحمدربنا على فضله عليا

لون البطانية اللى بتتغطى بيها فى الشتاء ؟
رمادي ..وأحيانا بتغطي بلحاف أحمر

لون الجورب-الشراب- المفضل لديك ؟
حسب لون الطقم اللي هالبسه

احساسك إذا داست قدمك فى الطريق على مخلفات اخراج حيوان- *** ولا مؤاخذة-
أكيد مش محتاج السؤال لإجابة

واحد لبس جلابية وحاطط عمامة وله لحية وبجيبه السواك وبيده المصحف؟

بقول يارب يكون فاهم أن الدين مش لبس بس ، وإنما معاملة

احساس يراودك فى اشارة مرور مغلقة بسبب مسئول كبير؟

ليه كده ..حرام عليه... وبفتكر جملة سيدنا عمر "اخاف أن اُسأل على دابة تتعثر في العراق ,وهومعثر بشر عن حياتهم

مهرجان مشاريع تخرج قسم صحافة...."كتبخانة" ويوثنك" أحلى أول وثاني....

لأول أول سأكتب إليكم في البداية كصحفية ..وأتمني أن تحوز قدرتي على الكتابة على إعجابكم...
*أن تضع بذرة في أرض خصبة أمراً سهلاً ،ولكن أن تمكث بجوار هذه البذرة لترعها وتسقيها وتلاحظ نموها لحظة بلحظة ، وتخاف عليها من الرياح لتهاجمها ، ويمكن أن تفني روحك فداء بقائها لتصبح شجرة ذات ثمرة هذا هو الأمر الصعب بعينه بل في كثير الأحيان قد يكون مستحيلاً.....ولكن طلاب قسم الصحافة دفعة 2007 رفضوا أن يكون هناك صعب أو مستحيل ، فذرعوا بذرة أفكارهم الصحفية المختلفة لتنبت لهم مجلات ثمارها فكر وعلم وتصميم على تقديم ماهو جديد ..اليوم شهدت لكم مهرجان مشاريع تخرج طلاب قسم الصحافة لدفعة 2007..مهرجان رائع على الرغم من أن جميع الطلاب وقفوا على أقدامهم لمدة 3ساعات قبل إعلان المراكز الأولى ، إلا أن إيمانهم ببذرتهم الصحفية وشوقهم لمعرف المركز الفائز ، جعل الوقت يمر عليهم كأنه ثواني معدودة ....
فبعد النقد الايجايبي من نخبة من أستاذة الصحافة في الجرائد والصحف ، عبر مدارالثلاث الساعات لمجلات"يوثنك _ كتبخانة_شطرنج_استغماية_مسيد كول_ السلم والثعبان_بكره_امين_تفاحة ادم_الثروة_شخابيط "جاءت اللحظة النهائية وإعلان المجلات الفائزة والحائزة على المراكز الأولى الثلاث وجاءت كالترتيب مجلة "كتبخانة" " المركز الأول ،ومجلة " يوثنك" المركز الثاني ومجلة" بكره"المكز الثالث
*اختلفت مضامين المجلات الثلاث الفائزة بالمراكز الثلاث الأولى ، فكانت مجلة " كتبخانة" مجلة ثقافية تخصصت في الكتب ،وتناولت جميع الموضوعات السياسية والفنية والرياضية والأدبية والمرأة والطفل والتنمية البشرية ولكن من منظور الكتب ، بالاضافة إلي الحوارات والتحقيقات فيما يتعلق بالكتب ، أما مجلة " يو ثنك " فهي مجلة ثقافية أيضا باللغة الانجليزية تتوجه إلي الشباب المسلم حول العالم الغربي تعرض لهم كل مايتعلق من جوانب الحياة السياسية والثقافية والرياضية والفنية وغيرها من اهتمامات الشباب المسلم حول العالم ، في حين تركزت فكرة مجلة "بكره " علي تقديم موضوعاتوأفكار تناسب فئة المراهقين من حميع الزوايا الفنية والرياضية والسياسية وغيرها ، مع تقديمهم لملحق برايل للمجلة كخدمة للمكفوفين.
يذكر أن باقي المشروعات تركزت مضامنيها في الساسية سواء فيما ترتبط بالوزراء مثل مجلة " شطرنج" أو الأحزاب المصرية مثل " السلم والثعبان" ، وكذلك مجلة "استغماية " التي رصدت الحياة السياسية في مصر وعلاقتها بأمريك، فضلا عن مجلات ( امين عن الدعاة_الثروة عن البيئة _والمسيد كول عن الموبيل _وشخابيط )
----------------------------------------------------------------------------
اسمحوا لي خلصت صحافة بقي ،وكتبت بموضوعية..من حقي اتكلم بقى عن تجربتي الشخصية في يوم حفل تكريمناالنهاردة
كتبخانة" طفلتي الصغيرة خدت المركز الأول ، حلم 15 إنسان طلع للنور وناس الحمد لله شكرت فيه وقالت كلام حلو في حقه ، وقال عليه مشروع رائع الحمد لله..........
*بس الأهم بجد مجموعة" يوثنك "الي خده المكز الثاني ، من أحب المجموعات إلي قلبي ، صدقوني كان ممكن أتنازل لهم عن مركزنا لو مش خدوا مركز لأنهم فعلا يستاهلوا
تصدقوا النهاردة كانوا فرحانين لنا ،وبيصفقوا لنا " كتبخانة" مش مجموعتهم على ا ي كلام يتقال في حقنا ، واحنا كمان كنا بنفرح اوي لما حد يعلق على مجلهتم بطريقة حلوة ويثني عليهم ، بجد كنا كأننا جروب واحد عنده مجلتين
أخلاق بجد مجموعة أخلاق ، كأن في بيينا حب وأخوة ومنافسة شريفة لدرجة أن كل مجموعة كانت نفسها المجموعة الثانية تاخد المركز الأول.
بجد مش هانسي لما قالوا " يو ثنك "المكز الثاني وفرحتي وحضني لصديقتي ؟؟أميرة وعائشة ..ولما قالوا "كتبخانة " المركز الأول ..لقتهم كلهم جنبنا..بجد حب من نوع مختلف اللي بنا وبينهم..يارب تديم صداقتنا بهم دايما
** مش عندي أي كلام تاني اقوله غير أن ربنا يوفقنا كلنا يارب في حياتنا ونشوف بعض صحفيين كبار بقلمنا الشريف الحر الذي ينشر الحق.
على فكرة ،وقبل ماتزهقوا من رغيي بوست يوم 12/6 كان مفروض بمناسبة أني تمت 21 سنة ..بس أنا اجلته ليوم 13/6 لأن فوزنا بالمركز الأول أصبح بالنسبة لي هو يوم ميلادي...كل سنةوأنا طيبة بكم ومعاكم وأقدر أكون عندحسن ظنكم بي .

مجلتي "طفلتي الصغيرة".....كتبخانة

اعتذر عن عدم كتابتي على البلوج منذ فترة ، لكن عذري الوحيد أني عندي امتحانات وهاخلص يوم13/6إن شاءالله، لكن هناك شئ ما دفعني للكتابة لكم النهاردة ،وهو أني أقولكم أن امبارح وبعد سنة تعب وإجهاد في سنة رابعة صحافة كلية الإعلام جامعةالقاهرة..حلمي وحلم مجموعتي اتحقق ...15إنسان حلموا حلم واحد يعملوا مجلة ثقافية عن الكتب مش اي مجلة مجلة من نوع تاني ، نقدم بها الثقافة بشكل جديد ، نساعد اللي نفسه يقرأ ويتعلم بس مش قادر أو مش لاقي حد يساعده ويقدم له مضمون جيد
امبارح7/6/2007 تاريخ هيتحفر في عقلي وقلبي يوم ماشفت حلمي على الورق بيتكلم وادامي ... النهاردة سلمنا مشروع التخرج بتاعنا مطبوع مجلة 104ورقة ، سلمنا 100 نسخة عشان لجنة التقيم .
مجلتنا عن الكتب ، عروض كتب ،حوارات عن كتب ،حوارات مع كتاب، في كل الفروع سياسية ورياضة وفن وأدب وتنمية بشرية وكل حاجة
مجلتنا "كتبخانة" ده اسمها ، كنت حاسة أني النهاردة ابني اتولد بين ايدي ..انا سعيدة جدا عشان حلمت حلم واتحقق ، معنى كده أن الأحلام مش مستحلية ،وعلى الرغم من أن اللي واجهنا من صعوبات ومتاعب وإحساس بالفشل أحياناً بس الحمد لله ربنا كمل لنا على خير
انا حبت افرح معاكم وخصوصا أن الحمد لله أصبح لي أصدقاء مدونين كتير بفتخر أني زرت مدونتهم
قبل مااخلص كلامي...عايز اقولكم على مجلة تانية تحفة اسمها "يو ثنك "من مشاريع التخرج هي مجلة بالانجليزي بس رائعة ،ومجموعتهم رائعة ، حبت اقولهم هايل شغلكم وشكرا على إطرائكم على مجلتنا ...على فكرة أصحاب المجلة في منهم لنكاتهم عندي على المدونة على رأسهم "زقزوق" تحت اسم عشرة أربع سنين وهو صاحب فكرة مجلتهم قبل التطوير وكاتب بوست عنها ، وكمان دندونة وسمسمة ,وأيمن
عايزه اقولكم حاجة قبل ما أنسي عندنا حفلة في الكلية يوم 13/6 ده مهرجان مشاريع التخرج كلية الاعلام قسم صحافة ،وفيه المجلات بتاخد مراكز،احنا مش يهمنا المركز على اد مايهمنا رأي زملائنا ورأي اللي نعرفهم .المراكز دي حاجة بتاعت ربنا
استوني مني بوست يوم 12/6...وبوست 13/6ده هيكون تغطية للحفلة

على فكرة : ده موقع مجلتنا "كتبخانة"
www.kotobkhana.com
بس لسه تحت قيد التطوير..بس باب شؤون وشجون والاخر فيه شغل

على فكرة كمان :اوعدكم هاحاول اعمل لكم اسكان من غلاف مجلتنا يوم 13 بس ادعولنا

حاجتان...عايزه اقولهم ..تسعموني ؟

لأول مرة اعقد على الجهاز , واحس أني مش قادرة اكتب اي حاجة , لأول مرة ينتابني شعور بالتوتر وعدم الاتزان وعدم القدرة على استيضاح الامور , والرؤية الثاقبة للأوضاع.
كل ده حسيت به بعد موضوعين اثروا في وألمونى:
**الاول : مايحدث في فلسطين بين فتح وحماس , النهاردة قلت لرئيس قسمي في الشغل اللي بيعملوه ده قلة أدب وانعدام وعي عنما يحدث حولهم, وأنهم لازم يفقوا بدل ماتنحسر القضية في مين أحسن فتح ولاحماس وننسي الأرض والعرض والأقصي , والمعركة الأم مع إسرائيل
بجد النهاردة حسيت اوي أني عايزه ادعي للشيخ أحمد ياسين , واقوله فينك , لو كنت موجود ماكنش وصل الوضع للسوء ده , واعتقد أنه لو كان لسه عايش وشاف اللي بيحصل , كان مات من الحسرة, أو مات وهو بيصلح الأحوال ديه
صعبت علي نفسي اوي لما شفت كاريكتير مصطفي حسين في الأخبار في الصفحة الأخيرة , وهو راسم صورة رجل فلسطيني شايل ابنه غرقان في دمه وبيسأله مراسل من قناة , ميه مين اللي اسقط القذيفة علي ابنك؟, قال الراجل له: والله ماعرف إذاكانت القذيفة من إسرائيل ولا أمريكا ولافتح ولا حماس
ربنا يهديهم , ويعدي الايام الجاي على خير , يحميك ياقدسي
***اما الموضوع الثاني : فهو دول دخول مصر عضوية المجلس العالمي لحقوق الإنسان , والسؤال الذي يطرحه نفسه , مصر بأمارة ايه ؟ ومصر ازاي يعني ؟
ازي دولة زي بلدنا تدخل في مجلس زي ده , وهي بتنهتك كل مايتعلق بالانسان , إذاكانت بتنتهك الإنسان نفسه , ونسى أنه موجود
ازا ي بعد اللي بيحصل في كل مصري كل يوم من ضباط الشرطة وقوات الأمن المركزي من إهانات وتحرش واعتداء
ازاي بعد اللي عملته وزارة الداخلية في بدو سيناء بعد حوادث التفجيرات الاخيرة
ازاي بعد الحكم على هويدا طه
ازاي بعد اقرار قانون المحاكم العسكرية , قانون الإرهاب
ازاي وليه , وبجد حرام ...حرام النفاق الدولي والسياسي ده
لا وكمان السعودية دخلت , في حين أن دول كالدنماراك وهولندا لم يصنفوا من الدول التي لاتحترم حقوق الإنسان
يامثبت العقل والدين يارب ..بجد حاجة تشل وترفع الضغط والسكر
ربنا اللهم إن كنا أذننبا في حقك , فاغفر لنا , وارحمنا أنك القادر عليهم ..خذ لنا حقنا واهدي لهم نفوسهم !

حداد على القدس

في مثل هذا اليوم منذ 59 عاما في عام 1948, سلب الغدر والخيانة جزء من وطننا الإسلامي العربي المذبوح , في مثل هذا اليوم اغتصبوا الأقصى ولم يلتئم جرحه المحمود حتي اليوم , في مثل هذا اليوم تأمر العرب والغرب على بيع القدس , في مثل هذا اليوم قامت دولة الكيان الصيهوني , في مثل هذا اليوم ولدت إسرائيل ولادة غير شرعية
في مثل هذا اليوم من كل عام احتضر على عجزي , ولكني اعود إلي الحياة من جديد لاحول عجزي إلي أمل وعزيمة في استعادة القدس والاقصي
ارثيك ياقدسي في يوم كنبتك , ارثي الشجاعة التي ماتت في الحكام العرب الذين خذلوكي على مدار 59 عاما , ارثي أنفسنا على عجزنا نحو دعمك , ارثي المروءة التي ضاعت عند كل عربي مسلم شارك في حفلة اغتصابك الجماعية ..ارثيكي في شعري لعل الشعر يشفي جرحنا الدامي

حداد على القدس
في يوم كهذا يوم
يعود بي الزمان
إلي ذكراكي
إلي الحلم الذي
أحببت رؤياه
وأتذكر موقعك
على الخريطة
و اسمك الذي كتبناه
فى الكتب والكراريس
أتذكر مسجدك العظيم
عندما اتلو القرأن
اتذكرك
يامن تمنيت
أن أموت على أرضها
وأكون من الشهداء
يامن سألت الله
إلا ويموتني
الاعلي باب أقصاك
لعلي اكفر عن ذنبي
في حقك
اليوم
يحتفلون بنصرهم
ويشربون النبيذ والشعير
على هتك عرضك
يتذوقون لطعام المعسول
فرحاً بعجز أولادك
الصهاينة يستمتعون
لقد أخذوك وكنا
على قيد الحياة
فلم نفعل سوي
النحيب والبكاء
صدقنا الوعود
فصارت حبر على ورق
صدقنا المشاعر
فصارت كالحجر
اليوم
نتحسر على فقدانك
نحزن على
واقعنا المرير
نتلذذ بالشجب والبكاء
منا من تذكروا
ومنا من نسوا
نسوا
موطن العروبة
ومهد الرسالات
نسوا القدس والاقصي
إذن ماذا سيتذكرون؟
عندما تحدثهم عن القضية
لايعرفوها
الا عبر افيشات
اليوم
اقدم الاعتذار
يامليكتي
فسامحيني
ياموطن عروبتي
واغفرى لي حماقتي
يكفيني قلبي الممزق
بين الضلوع
بسكين الاحتلال المسموم
اليوم
اعدك
ألا استسلم
واجاهد من أجلك
لن تظلي هكذا
ستعودي مادام الدم
في شرايين البشر
يتدفق بقوة
ليرسم صورة
صورة غضب
سينفجر يوما
في وجهها
ليجعل من دولة
الصهاينة
كائناً مسخاً
بلا وجود
بلامعني
بلا اسم
بلاا ي شئ

أهواك

الشعر ده كتبته أمبارح بعد صلاة الفجر , وكنت بتكلم مع صديقة لي , صاحبة مدونة بحبك يامصر , كنا بنتكلم عن مصر وأحوالها ومافيها من فساد وانهيار , إننا لازم نغير مصر للأحسن , ومش معني أن فيها حاجات كتير أن مصر وحشة..وقول ماقالت صحبتي كلمة مصر , لقيت الكي بودر بتكتب الكلام ده ...يارب يعجبكم

أهواكِ
إذا قلت أهواكِ
فإني أهواكِ
يامن أحببت
روحي فداكِ
أعشقك
يا منى النفس
يامن لأجلك صار
الحب حب
أنت الحب
في زمن ضاعت فيه
المشاعر والأحلام
أهواكِ مهما طال العمر
فحبك داء لامفر
يجري في عروقي
يتداخل مع ذرات دمي
إذا تركتني يوما
فقدت الحياة
وصار الوجود فناء
تنحبس أنفاسي
ويتوقف قلبي عن النبض
ودمائي تتجمد
وأضحيت فاقد الوعى
أري في ضلالتي
صورة لك من ماضي
ماضي يذكرني بك
بحبنا الذي كان
اجري وراء الماضي لاجدك
ولكن لانملك الة الزمان
لايمكن أن نعود
فاستسلمت
وقررت
لا حياة بعدك ودونك
لم يعد أمامي سوي
أن اترك فقدان الوعي
يلتهمني
أو أنك تعودي
فتنقذني
لم أعد حقاً
أملك الاختيار
وأنا في الانتظار
أما أن تأتي
أو يُتخذ القرار
وأترك عالمي للأبد
أعود إلي الحقيقة
إلي الثرى
لانحت اسمك عليه
على كفني
على قبري
بحروف من نور
اسمك يامعشوقتي
وحروفه الثلاثة الناعمة
ميم-صاد-راء
مصر

الجو حر ....سرايا بيقولك.. اقلعي الحجاب هيبقي برد!!!

عزيزتي المحجبة لو الجو بيزيد حر يوم بعد يوم , ومش عارفة تعملي ايه عشان تتخلصيه منه , مش هاقول لك مش تنزلي من البيت و ولا مش تمشي في الشمس , ولا تاخدي دش بارد ..هاقول لك اخلعي الحجاب , بلا وجع قلب ....الكلام ده مش كلامي وعمره ما هيكون كلامي , لكنه ملخص ماقاله أسامة سرايا رئيس تحرير الأهرام في ندوة " كنيسة سازن جوزيف" بوسط القاهرة , الاخ _منه لله _ سرايا منزعج _ربنا يزعجه كمان وكمان _ من الانتشار المزعج للحجاب بين الفتيات , وقال أنه على الفتيات عدم ارتداء الحجاب بسبب ارتفاع درجة حرارة الجو في مصر مما يؤثر سلباًُُ على صحة الفتيات!!!!!!نفسي حد يقوله أن المسلمات في السوادن وخط الاستواء بيلبسوا حجاب مش مصر بس, ودول الخليج العربي اللي بيتحرقوا في الجو لابسين حجاب , جات على مصراللي قاريفين كل الناس بأن جوها ربيع جاف صيفا , دفئ ممطر شتاء ,الجو فيها بقي أحر من لستة الدول ديه _لا اله الاالله....هاقول ايه ربنايكرمه زي ماكرم رؤساء مصر _ من ناحية تانية , حضرته لم يجد سوي كنيسة سان جوزيف ويعلن رأيه .ضاقت به الدنيا , وكمان عايز يقلص مساحة الفكر الديني الاسلامي لاجل نشر مساحة للدين المسيحي , ويشرف على الاثنين شيخ الازهر ومفتي الجمهوري..وطبعا أنا مش عندي اعتراض أن الصحافة تكون أحوار أديان , ماشي بس مافيش حاجة تجي على حساب حاجة ونفسي أعرف ايه سر تفاخره , حسسني أنه فتح عكة, كل ده عشان قال لابنته مش تلبسي الحجاب عشان الجو حر وهيكون مضر للصحة , ولا عشان قال كده في ندوة الكنيسة ولا ايه بالضبط ,.وعشان ماحدش يقول حرية الرأي ومش حرية الرأي ..حتي اللي بيقول رأي بنرفضه في الحجاب بيدعمه بأدلة حتي لو هي غير صحيحة من وجهة نظرنا بس في حاجة يتكلموا عليها سواء من السنة الضعيفة أو تفاسير معينة للقرأن أو سياق مجتمع لكن يوم ما يكون الرأي مبني على حالة الطقس داخل جمهورية مصر العربية , دي تبقي حاجة لا تحتمل ...نفسي بجد يسكتوا بقي , هوالحجاب مضايقهم في ايه , واحدة من المحجبات اشتكت له؟!..ياريت لما يقولوا خير أو يصمتوا..ارحمنا يارب.
الموضوع موجود في ولاد البلد , مقال بعنوان:سرايا: الحجاب ضار بالصحة , www.20at.com

قلمي الحر

إلي زوار مدونتي اللي بيجبروا بخاطري دائماُ
بعد ما جاوبت على التاج واللي حصل حصل ... حدث تغيير طفيف في اسم المدونة من قلم حر إلي قلمي الحر وذلك لعدة أسباب:
اولا: لأني بالصدفة اكتشفت ان في مدونة اسمها قلم حر , فقلت بلاش تشابه واغير شويه
ثاينا: كان صعب اغير الاسم بشكل جذري , لأن بحب جدا لفظ قلم لأني صحفية والقلم مهم جدا عندي ...وكمان لفظ حر ده بحياتي كلها لأني اعشق الحرية , وخاصة لما تكون صفة لقلم , وكمان لأن أصحابي اللي بيجبروا خاطري ويزورا المدونة اتعودوا على الاسم
ثالثا: كنت هاختار قلم حر واحيانا رصاص , بس قلت كبير اوي, وفضلت قلمي الحر , كنوع من التخصيص, بعد مشاورات مع زميلي أحمد عبد الفتاح صاحب مدونة يالالاللي , وكمان لقيت الاسم الجديد ماشي مع سياق الاسم الأول ولنك المدونة
أتمني يارب التغير يكون للأحسن , ويكون عجبكم
....علي فكرة أنا مررت التاج لأصحابي أحمد عبد الفتاح , سارة , فاروق , أصحاب مدونات يالالالي , مقاومة , خواطر شاب غاصب , وأوعدكم أول ما أعرف احط لنك ازاي هاحط لنكتهم عشان تشوفه مدوناتهم

جاوبت على التاج ......بس ربنا يستر

مش عارفة بجد أقول ايه رغم أني أزعم أني واحدة عرفه عيوبها قبل مميزاتها , دايما بتصدر العيوب قبل المميزات , لكن صعب جدا اتكلم عن نفسي واقول اللي ميعرفوش حد عني ..ورغم أن السؤال "التاج " اتبعت لي المبارح من دينا , وبالطبع مسألتش اي حد عن ايه اللي شيفه في مستخبي , ولأن أبي وأمي لو سألتهم مش هيقولوا , ولو سألت أصحابي في الكلية اللي بعتز بجد بمعرفتهم هيقولوا معظم الحاجات العادية اللي فيه..فحاولت استرجع على مدار حياتي وبالذات منذ دخولي الكلية والعمل الصحفي ايه اكتر الحاجات اللي اتقالت لي وبجد كشفتني اوي ,مع الحاجات الي انا شايفها في نفسي ..وربنا يستر بقي
وهنبدأ مع بعض دلوقتي:

أولا:أنا شخصتين في شخصية واحدة , عندي شخصية جادة ومجتهدة طول اليوم بتتعامل مع الناس , من الاخر تقول راجل بيتعامل معاهم , وده سر أن اسمي علاء في الشغل , ودي حكاية طولية أصحابي في الكلية عرفنها ..اوعدكم اقولها لكم في بوست لوحده..المهم الشخصية الجامدة اوي ديه , جوها شخصية مش بتطلع اللي في أوقات معينة . شخصية رومانسية إلي أبعد الحدود , هشة جدا وحساسة جدا ونقية جدا ودموعها قريبة جدا جدا , وسهل الناس تحس أنها مضايقة من ملامح وشها على طول , والشخصية التانية ديه ممكن تتكسر لو طلعت بره وتعاملت مع المجتمع ..عشان كده هي مستخبية أو بمعني أصح أنا دائما بخبيها ..عشان خايفة انجرح

ثانيا: أنا حد طموح جدا بس من كتر طموحه عنده شك دايما أنه هيقدر يحقق اللي هو عايزه عشان كده بخاف قوي أن أموت قبل ما أحقق أحلامي , دايما حاسة أني مش واثقة في نفسي خاصة على المستوي الإنساني , دايما حاسة أن الناس صعب تحبني , صعب أكون صديقة لهم , دائما بحب الناس وبهتم بيهم جدا جدا واحيانا في ناس بتكون بالنسبة لي محور اهتمامي , لكن عمري ماكنت أنا محل اهتمام أي حد عشان كده بطلت أفكر في مقابل العطاء وفضلت أدي وبس والمكافأة عند ربنا..وعلى المستوي المهني دايما عايزه أكون أحسن وبقول دايما لا أنا لسه مش حققت حاجة لازم اكثر وأكثر ..وده اللي مخلي حياتي جد جدا , حتي الترفيه بالنسبة لي جد لاني عايز أحقق أحلامي

ثالثا : بحب جدا الأطفال لدرجة لاتتصور لما بشوف طفل في المترو باكون عايزه أخده من مامته واضمه في حضني خاصة لو كان صغير. تقدروا تقولي عندي طاقة مهماهتية عالية جدا , وبتصل لكل اللي حولي في اي مكان انا فيه بس بخاف مهماهتي ديه تكره الناس في لاني لما بحب بحب بقوة جدا ممكن توصل لدرجة أن اللي ادام بيحس أنه هيتخنق ..بس رغم كل ده حلم حياتي أني أكون أم , وأم صالحة ..
كمان أنا بحب أكلة المسعقة جدا جدا , ممكن تغرقوني في مسعقة وبابا غونج وسلطة وتسيبوني وتمشوا , بعشق عائلة الباذنجان ومعها السلطات وضيفوا عليها شربة الخضار أو الخضار سويته ,دول أكلات عمري .. بحب كمان من الحيوانات الحصان والغزال والهدهد والظبي والحمام والنمر ..ولوني المفضل على الاطلاق الأزرق بكل درجاته بس أحسنهم درجات لون السماء ..وبحب اوي اوي ومن غير تحيز حرف العين لانه حرف وسطي وأنا أفضل الوسطية في حياتي...بحب برجي الجوزاء رغم أن كل اللي أعرفهم بيكرهوا الجوزاء ..ليه مش عارفة , لدرجة هتكرهني فيه

رابعا: نفسي أتزوج واحد زي سيدنا عمر بن الخطاب . شرطي الوحيد أن يكون زيه مش مهم عنده ايه ..بس يكون زي عمر بن الخطاب في كل حاجة , او على الاقل فيه 10% منه , لان ال10% في الزمن ده حلو قوي .. هتقولوا ليه اخترتي سيدنا عمر هاقولكم لاني بتعتبره شخص غير عادي , شخصتين في شخصية واحدة , يجمع بين القوة في دفاعه عن الحق والحرية والحزم والجدية والاتقان والشجاعة وقول الحق , ومعهم القلب النقي الطيب الرحيم الرؤؤف المتواضع الحليم , , وكتل من الحنان والاحتواء والدفء في المعاملة ..أي أنه رجل بمعني الكلمة , ولو كان ممكن أجد راجل فيه 10% من النبي صلي الله عليه وسلم كنت قلت عايز واحد زيه ..بس اعتقد ممكن ولو بنسبة 1% الاقي زي سيدنا عمر واعيش معاه في بيت على البحر في اي حتة مع اولادي ومش عايزه حاجة من الدنيا بس يكون زيه ...بمناسبة الكلام بقي عن شريك الحياة . عندي دايما خاطر أني عمري ماهالقي شريك الحياة ده , لأني مافيش في حضرتي اي حاجة تعجبه , ولو جه غالبا هتكون والدته دعت عليه في ليلة قدر ,

خامسا: أنا بخاف جدا من يوم الحساب طبعا ده بالنسبة للحياة الأخرة , بس أتمني من الله أن أموت شهيدة وأنا بعمل مراسلة على عتبة المسجد الأقصى , أما من الدنيا بخاف من حاجات كتير , على المستوى المعنوي بخاف من أني انكسر أو اتهزم أو أشعر أني ضعيفة , أو اتصطدم في حد ويخون ثقتي فيه , وبكره الخيانة جدا جدا جدا جدا بكل أشكالها ,بخاف أني أكون وحيدة , وبخاف أني أفشل خاصة في شغلي ( الصحافة) لاني بالنسبة لي الصحافة حياتي كلها لان مش عندي حاجة تانية غيرها بعد ربنا طبعا... بخاف أني أزعل حد أو أموت وحد زعلان مني ....بخاف أن مصر تنهزم وتحتضر أكتر من كده , أو أشوفها يوم وهي بتحتل .......وعلى المستوى المادي , بخاف من كل الحشرات والزواحف من أول النمل لغاية الثعبان مرورا بالفأر والسحلية ..الخ , اعتقد أني لو أنا وفأر في مكان واحد ومقفول ومش فيه غير شباك بسلك هاقردد السلك أنا وانط من الشباك.

اعتقد أن كده كفاية أوي ..أنا شكلي صدعت دماغكم بجد , وهتكرهوني , ..بس أنا قلت كتير عن نفسي عشان صحابي طلبوا مني يعرفوا الجانب الإنساني عندي , واخفف رتم السياسية اللي في البوج بتاعي .. فحاولت أن أقدم جزء إنساني , قبل ما أكمل السياسية

وصل لي تاج من دينا زميلتي في كفاح الدراسة وصاحبة مدونة
never miss a moment
ومفروض أجاوب على خمسة أسئلة أقول فيهم على 5 حاجات ماحدش يعرفها عني ..أوعدك يادنيا بكره هاجاوب على التاج عشان الحق افكر , هاكتب ايه الخمس حاجات اللي الناس مش تعرفهم عني نظرا لاني دايما عاملة زي الكتاب المفتوح الناس بتعرف اللي جوه قلبي من على لساني ووشي .
بس هاحاول أدور لك عن حاجات في خبايا شخصيتي استنني بكره..ويارب تعجبكم

حتي في الكورة ...الأمن ورانا ورانا

لا أعلم لماذا بدأت أشعر منذ تسوية التعديلات الدستورية في مطبخ الرئاسة وسلق قانون الأرهاب ..أن البلد انفجرت فيها ماسورة ضباط أمن مركزي وعمليات خاصة لدرجة أني شككت أننا مقبلون على حدث قومي هياهد الدنيا ..قلت في عقل بالي يمكن بيحضروا لاستقبال بيع سيناء(تحريرها سابقا) أو لانهم بيحضروا لفرح حد مهم في البلد , لكن الفرح طلع في شرم مش هنا ..فقلت امال في ايه؟ وقررت اطرد الهاجس وقلت لنفسي مافيش حاجة ده هسس أمني بس الهاجس تأكد من تصريح قوات الأمن المنوطة بضبط الأمن غدا في استاد القاهرة وفقا لما نشرته المصري اليوم و عدم سماحهم بدخول أزيد من 60ألف متفرج في مباراة الاهلي والبرشلونة , بحجة أن سعة الاستاد لاتستوعب اكثر من ذلك , وحملت النادي الاهلي مسؤلية طباعة 15ألف تذكرة إضافية ليصل عدد التذاكر إلي 75ألف نسخة وستقوم قوات الأمن المركزي بغلق أبواب دخول الاستاد بعد اكتمال سعته الأمنية من المتفرجين حتي لو كانوا من حملة التذاكر مما سبب خلاف حاد بين النادي الاهلي والأمن ,بس أنا أعتقد أن قوات الأمن خايفة من التجمهر..وأعتقد أنهم هتيدخلوا في كل حاجة في حياتنا بعد كده حتي في الكورة ’, وبعيدا عن أني بشجع الاهلي لسبب بسيط لاني بحس أنه الحاجة الوحيدة الباقية اللي بترفع اسم مصر لما بيكسب وده اللي يهمني..الأمن المركزي وقوات العمليات الخاصة وصلت كمان للكورة , مش بعيد نلاقيهم بعد كده عند محلات الفول المشهورة لمنع التجمهر برده ..احتياطي !!!
على فكرة الصورة نقلا عن المصري اليوم
البوست ده حاجة بمناسبة الاهلي وبرشلونة....وإن شاء محضرة لكم بوست جامد جدا يوم 25 ..استنونني ويارب يعجبكم

ممكن نعيش؟

نفسي أكون مجنون
أعيش بحرية في الكون
اضحك زي ماأحب
واحزن وقت ما أحب
اعيش بحرية
اقول لا بأعلى صوتي
لكل شئ يقيدني
اصرخ من كتر المي
في وش كل قامع
واكسر قيود مجتمع
ضاعت فيه القيم
وبقي الحكم للزمن
امتي .امتي
هلاقي نفسي
وأقدر أكون أنا
من غير خوف
ولاالم وجراح
من غير حساب على
ذنب مارتكبتوش
كل ذنبي
أني عايزه أعيش
بس برده
أنا هاعيش حياتي
لغاية أخر نفس

امتي نبص صح؟؟

محيرني حاجة صعبة جدا , ليه بنبص للناس اللي بنقابلهم من بره بس , وحكمنا دايما سريع عليهم, ليه نطلق دايما أحكام جزافية على كل اللي بنشوفهم , ليه بننسي أننا نبص في قلوبهم , نعرف إذا كانت نظيفة وعمرانة بالخير ولا فاضية ومعطوبة ..ليه لسنا دائما سابق عقلنا وقلبنا في الحكم على الناس. انا مثلا, ببص لقلوب الناس اللي بتعامل معاهم , وبحس بقلوبهم إذا كانت نظيفة ولا ايه, لأني مؤمنة بحديث الرسول صلي الله عليه وسلم , في الجسد مضغة إذا صلحت , صلح الجسد كله , وإذا فسدت ,فسد الجسد كله , والمضغة هي القلب... فليه الناس كلها مش تكون كده؟؟..ده سؤال وأتمني أعرف رأيكم فيه ؟

خرجوا من الملعب

الدكتور أحمد زويل قال في حواره في جريدة المصري اليوم أن "العرب خرجوا من الملعب"ولكن الحقيقة أن العرب لم ينزلوا الملعب أساسا ولم يشاركوا في أي مباريات سابقة أو حالية , ولن يشاركوا في أي مباريا ت قادمة ..لانهم دائما يحبون الجلوس في مدرجات المشاهدين , أو متابعة المبارة من فوق كراسيهم السلطانية المثبتين فيها بمسامير نحاسية إلي الأبد , إلا أن يأتي أمر الله , وفقاً للمثل المصري القائل "اصبر على جارك السو ليرحل , ياتيجي مصيبة تاخده" بس المشكلة امتي تيجي المصيبة بقي وتأخذ الحكام العرب ؟

ليه يامصر؟

ليه يامصر ساكتة ؟
على حكامك الظالمين
ليه سايبه شعبك؟
بلقمة العيش مشغولين
ليه راضية بالهوان؟
رغم أنك عزيرة
ليه كل ماتجي تقومي؟

تنامي وتنامي
فوقي واصحي
مابقاش في كلام
شبابك فقد الأمل
وبقي وجودهم علي أرضك
اشبه بالانتحار
أرجوك خديهم في حضنك
حاسيسهم أنك هنا
مرة واحدة
حركي ايجايبتهم
وحققي بيهم
حلمنا الكبير
مصر بتوب الحرية

نعم للحرية ..لا للقمع

من حق كل واحد فينا حتي بعد تقرير الماد 179 أن يقول رأيه بحرية وبدون نقاش ...حتي لو الحكومة هتلعق له المشنقة , وعلينا أن نرفض أي نوع من أنواع القمع الفكري أو السياسي أو أننا نحاسب إنسان بناء على انتمائه الفكري أو السياسي ولأجل ذلك علينا كلنا التضامن مع المدون عبد المنعم محمود , وأن نطالب بحريته

على كل واحد منا مهما كان فكره السياسي ليبرالي , اشتراكي , أخواني , شيوعي , إن شاء الله يكون ليس له أي حزب سياسي أصلا أن يطالب بحرية عبد المنعم ..لأن قمع حرية أي مدون الأن معنها أن الدور جاي على كل واحد فينا

بكره في وقفة احتجاجية أمام نقابة الصحفيين الساعة 5 تضامنا مع عبد المنعم والمطالبة بحريته دفاعأ عن حريتنا جميعا..