جاوبت على التاج ......بس ربنا يستر

مش عارفة بجد أقول ايه رغم أني أزعم أني واحدة عرفه عيوبها قبل مميزاتها , دايما بتصدر العيوب قبل المميزات , لكن صعب جدا اتكلم عن نفسي واقول اللي ميعرفوش حد عني ..ورغم أن السؤال "التاج " اتبعت لي المبارح من دينا , وبالطبع مسألتش اي حد عن ايه اللي شيفه في مستخبي , ولأن أبي وأمي لو سألتهم مش هيقولوا , ولو سألت أصحابي في الكلية اللي بعتز بجد بمعرفتهم هيقولوا معظم الحاجات العادية اللي فيه..فحاولت استرجع على مدار حياتي وبالذات منذ دخولي الكلية والعمل الصحفي ايه اكتر الحاجات اللي اتقالت لي وبجد كشفتني اوي ,مع الحاجات الي انا شايفها في نفسي ..وربنا يستر بقي
وهنبدأ مع بعض دلوقتي:

أولا:أنا شخصتين في شخصية واحدة , عندي شخصية جادة ومجتهدة طول اليوم بتتعامل مع الناس , من الاخر تقول راجل بيتعامل معاهم , وده سر أن اسمي علاء في الشغل , ودي حكاية طولية أصحابي في الكلية عرفنها ..اوعدكم اقولها لكم في بوست لوحده..المهم الشخصية الجامدة اوي ديه , جوها شخصية مش بتطلع اللي في أوقات معينة . شخصية رومانسية إلي أبعد الحدود , هشة جدا وحساسة جدا ونقية جدا ودموعها قريبة جدا جدا , وسهل الناس تحس أنها مضايقة من ملامح وشها على طول , والشخصية التانية ديه ممكن تتكسر لو طلعت بره وتعاملت مع المجتمع ..عشان كده هي مستخبية أو بمعني أصح أنا دائما بخبيها ..عشان خايفة انجرح

ثانيا: أنا حد طموح جدا بس من كتر طموحه عنده شك دايما أنه هيقدر يحقق اللي هو عايزه عشان كده بخاف قوي أن أموت قبل ما أحقق أحلامي , دايما حاسة أني مش واثقة في نفسي خاصة على المستوي الإنساني , دايما حاسة أن الناس صعب تحبني , صعب أكون صديقة لهم , دائما بحب الناس وبهتم بيهم جدا جدا واحيانا في ناس بتكون بالنسبة لي محور اهتمامي , لكن عمري ماكنت أنا محل اهتمام أي حد عشان كده بطلت أفكر في مقابل العطاء وفضلت أدي وبس والمكافأة عند ربنا..وعلى المستوي المهني دايما عايزه أكون أحسن وبقول دايما لا أنا لسه مش حققت حاجة لازم اكثر وأكثر ..وده اللي مخلي حياتي جد جدا , حتي الترفيه بالنسبة لي جد لاني عايز أحقق أحلامي

ثالثا : بحب جدا الأطفال لدرجة لاتتصور لما بشوف طفل في المترو باكون عايزه أخده من مامته واضمه في حضني خاصة لو كان صغير. تقدروا تقولي عندي طاقة مهماهتية عالية جدا , وبتصل لكل اللي حولي في اي مكان انا فيه بس بخاف مهماهتي ديه تكره الناس في لاني لما بحب بحب بقوة جدا ممكن توصل لدرجة أن اللي ادام بيحس أنه هيتخنق ..بس رغم كل ده حلم حياتي أني أكون أم , وأم صالحة ..
كمان أنا بحب أكلة المسعقة جدا جدا , ممكن تغرقوني في مسعقة وبابا غونج وسلطة وتسيبوني وتمشوا , بعشق عائلة الباذنجان ومعها السلطات وضيفوا عليها شربة الخضار أو الخضار سويته ,دول أكلات عمري .. بحب كمان من الحيوانات الحصان والغزال والهدهد والظبي والحمام والنمر ..ولوني المفضل على الاطلاق الأزرق بكل درجاته بس أحسنهم درجات لون السماء ..وبحب اوي اوي ومن غير تحيز حرف العين لانه حرف وسطي وأنا أفضل الوسطية في حياتي...بحب برجي الجوزاء رغم أن كل اللي أعرفهم بيكرهوا الجوزاء ..ليه مش عارفة , لدرجة هتكرهني فيه

رابعا: نفسي أتزوج واحد زي سيدنا عمر بن الخطاب . شرطي الوحيد أن يكون زيه مش مهم عنده ايه ..بس يكون زي عمر بن الخطاب في كل حاجة , او على الاقل فيه 10% منه , لان ال10% في الزمن ده حلو قوي .. هتقولوا ليه اخترتي سيدنا عمر هاقولكم لاني بتعتبره شخص غير عادي , شخصتين في شخصية واحدة , يجمع بين القوة في دفاعه عن الحق والحرية والحزم والجدية والاتقان والشجاعة وقول الحق , ومعهم القلب النقي الطيب الرحيم الرؤؤف المتواضع الحليم , , وكتل من الحنان والاحتواء والدفء في المعاملة ..أي أنه رجل بمعني الكلمة , ولو كان ممكن أجد راجل فيه 10% من النبي صلي الله عليه وسلم كنت قلت عايز واحد زيه ..بس اعتقد ممكن ولو بنسبة 1% الاقي زي سيدنا عمر واعيش معاه في بيت على البحر في اي حتة مع اولادي ومش عايزه حاجة من الدنيا بس يكون زيه ...بمناسبة الكلام بقي عن شريك الحياة . عندي دايما خاطر أني عمري ماهالقي شريك الحياة ده , لأني مافيش في حضرتي اي حاجة تعجبه , ولو جه غالبا هتكون والدته دعت عليه في ليلة قدر ,

خامسا: أنا بخاف جدا من يوم الحساب طبعا ده بالنسبة للحياة الأخرة , بس أتمني من الله أن أموت شهيدة وأنا بعمل مراسلة على عتبة المسجد الأقصى , أما من الدنيا بخاف من حاجات كتير , على المستوى المعنوي بخاف من أني انكسر أو اتهزم أو أشعر أني ضعيفة , أو اتصطدم في حد ويخون ثقتي فيه , وبكره الخيانة جدا جدا جدا جدا بكل أشكالها ,بخاف أني أكون وحيدة , وبخاف أني أفشل خاصة في شغلي ( الصحافة) لاني بالنسبة لي الصحافة حياتي كلها لان مش عندي حاجة تانية غيرها بعد ربنا طبعا... بخاف أني أزعل حد أو أموت وحد زعلان مني ....بخاف أن مصر تنهزم وتحتضر أكتر من كده , أو أشوفها يوم وهي بتحتل .......وعلى المستوى المادي , بخاف من كل الحشرات والزواحف من أول النمل لغاية الثعبان مرورا بالفأر والسحلية ..الخ , اعتقد أني لو أنا وفأر في مكان واحد ومقفول ومش فيه غير شباك بسلك هاقردد السلك أنا وانط من الشباك.

اعتقد أن كده كفاية أوي ..أنا شكلي صدعت دماغكم بجد , وهتكرهوني , ..بس أنا قلت كتير عن نفسي عشان صحابي طلبوا مني يعرفوا الجانب الإنساني عندي , واخفف رتم السياسية اللي في البوج بتاعي .. فحاولت أن أقدم جزء إنساني , قبل ما أكمل السياسية